Mapigano ya kijeshi yaua 30 Sudan

Mapigano makali ya siku kadhaa kati ya vikosi hasimu vya kijeshi katika mji wa Nyala nchini Sudan yamesababisha vifo vya raia 30 na makumi ya wengine kujeruhiwa.

Vikosi vya wapiganaji wa (RSF) na wanamgambo washirika wa Kiarabu vimekuwa vikijaribu kuteka kambi kuu ya jeshi katika mji huo ambao ni mji mkuu wa jimbo la Darfur Kusini.

Jeshi limejibu kwa silaha kali na makombora yamepiga maeneo ya makazi.

Mfanyikazi mmoja wa haki za binadamu aliambia BBC kwamba watu wengi wamekimbilia vijijini nje ya mji.

Pia alisema wapiganaji wa RSF walikuwa wakiwalazimisha raia kuwakabidhi magari yao.

Eneo la magharibi la Darfur limeshuhudia vurugu mbaya zaidi tangu mapigano makali ya madaraka yalipozuka mwezi Aprili kati ya jeshi na RSF.

Kumekuwa na majaribio kadhaa ya kikanda ili kuzifanya pande hizo mbili kukubaliana kusitisha mapigano.