Majambazi wamuua na kumuibia dereva bodaboda, wambaka mkewe

Dereva bodaboda mwenye umri wa miaka 32 ameuawa na majambazi waliomuibia pikipiki na simu mbili za rununu na kisha kumbaka mkewe katika kijiji cha Got Rateng' eneo la Lambwe Mashariki, Kaunti ya Homa Bay nchini Kenya.

Inasemekana kuwa majambazi hao walivamia nyumba ya Jacob Osore saa kumi asubuhi Jumanne ambapo walimvamia kwa panga na kumfanya kupoteza fahamu na kisha kuamua kumshambulia mkewe.

Chifu wa Lambwe Mashariki Benard Ouma alisema majambazi hao walisikika wakidai pesa ambazo Osore alizipata kupitia harambee iliyoandaliwa wiki chache zilizopita ili kumsaidia kununua pikipiki nyingine kwani ya awali ilikuwa imeibiwa katika tukio la awali la wizi.

Osoro alikimbizwa katika Hospitali ya Rufaa ya Kaunti ya Homa Bay ambapo aliaga dunia.

Mkewe pia anapata nafuu kutoka kwa kituo hicho hicho. Mwili wa marehemu umelazwa katika hifadhi ya maiti ya Hospitali ya Rufaa ya Kaunti ya Homa Bay.

Wakati huo huo, Kamanda wa Polisi wa Kaunti Ndogo ya Mbita Solomon Barngetuny amesema kuwa maafisa wake tayari wako katika eneo la tukio.