Mahakama yaamuru mwili wa Silas urejeshwe mochwari

Mahakama ya Rufaa imeagiza mwili wa Silas Igweta uhifadhiwe katika chumba cha kuhifadhia maiti cha Umash jijini Nairobi kusubiri kesi iliyowasilishwa na mke wa pili wa marehemu, Sarah Kathambi.

Sarah Kathambi na mke mwenza Grace Rigiri wanapigania ni nani anafaa kuzika mabaki ya mume wao. Igweta alifariki jijini Nairobi mnamo Februari 17 akiwa na umri wa miaka 100. Alikuwa akiishi na mke wake wa pili Kathambi alipofariki.

Huku Kathambi na watoto wake Purity Kinya na Miriam Makena wakifanya mipango ya mazishi, mke wa kwanza Rigiri na mwanawe Mathew Kobia walihamia mahakamani wakitaka kuamuru mwili huo uachiliwe kwao kwa mazishi.

Wanawake hao wawili wana nyumba zao Kianjai (Rigiri) na Lairangi Mumui (Kathambi) ambazo zimetengana takriban kilomita 40 ndani ya Eneo bunge la Tigania Magharibi katika Kaunti ya Meru.

Hakimu mkuu wa mahakama ya Milimani G.M Gitonga mwezi Aprili aliamuru Igweta azikwe nyumbani kwa mkewe wa pili akisema familia ya pili ilikuwa na uhusiano wa karibu wa kifamilia na marehemu.

Hakimu pia aligundua kuwa ni wosia wa Igweta kwamba azikwe Lairangi Mumui. Lakini Rigiri alihamia Mahakama Kuu kupinga uamuzi huo.

Alishinda baada ya Hakimu Stephen Riechi katika hukumu yake ya Mei 21 kuagiza mwili wa Igweta uachiliwe kwa mke wake wa kwanza kwa mazishi huko Kianjai kwa mujibu wa mila na desturi za wameru.