Magazeti Jumatatu, Juni 7: Tangatanga wadai Uhuru anataka kusalia ofisini 2022
Magazeti ya Jumatatu, Juni 7, yameangazia siasa za urithi za 2022 ambapo wanasiasa wanaomuegemea Naibu Rais William Ruto wananusia hatari wakihoji kuwa huenda chaguzi hizo hazitafanyika.
Magazeti haya pia yamegusia mkwaruzano kati ya Rais Uhuru Kenyatta na Idara ya Mahakama kuhusu kuapishwa kwa majaji 34 na sababu za sita kupigwa makasi.
1. Daily Nation Mrengo wa Tangatanga unaoongozwa na Naibu Rais William Ruto sasa unadai kuwa huenda Uchaguzi Mkuu hautafanyika kwa sababu Rais Uhuru Kenyatta anadaiwa kupanga njama ya kutumia Mpango wa Maridhiano (BBI) kurefusha muhula wake.
Wakereketwa wa BBI wameshikilia kuwa uchaguzi mkuu ujao lazima utaendelea baada ya rifarenda ambayo muda wake unaendelea kudidimia.
Huku muda wa rifarenda ukididimia na kuhitalafiana na uchaguzi mkuu, wanachama wa Tangatanga wanahoji kuwa ni mpango wa kuahirisha chaguzi hizo.
Wanasiasa hao wameapa kukosoa njama hiyo wakisema watawatumia Wakenya kuzuia majaribio yoyote ya kuahirisha uchaguzi huo.
Fauka ya hayo, wanaounga mkono BBI wamepuzilia mbali madai hayo wakishikilia kuwa ni vita pekee ndio vitachelewesha chaguzi hizo.
Pia waliongezea kuwa endapo kuahirishwa kwa chaguzi hizo kutasaidia kubadilisha katiba basi ni muhimu.
2. The Standard Gazeti hili linaripotia kuhusu kutokota kwa uhasama kati ya kiongozi wa ODM Raila Odinga na vinara wengine wakuu wa NASA kuhusiana na miradi iliyozinduliwa na Rais Uhuru eneo la Luo-Nyanza wakati wa ziara yake ya siku tatu.
Viongozi hao wanadai kuwa huenda watahitajika kuwa karibu na rais ili kuzawadiwa miradi ya mamilioni ya pesa.
Wanasiasa ambao ni washirika wakuu wa Musalia Mudavadi wameapa kumshinikiza kiongozi huyo wa ANC kuwania kiti cha urais ili maeneo yao yafaidike.
"Umeona kile kimefanyika Nyanza wiki jana sisi wa magharibi tunataka Musalia kuwania urais pia sisi tufaidike," alisema Ayub Savula mbunge wa Lugari.
Walishangazwa na sababu za Raila kutoshinikiza maeneo mengine pia yafaidike ikiwemo Magharibi na Ukambani, ambao viongozi wao wamekuwa wakimuunga mkono.
Wale wa kutoka Ukambani pia wameapa kumuunga mkono kiongozi wa Wiper Kalonzo Musyoka kuwania kiti hicho ili kufaidi eneo hilo.
3. People Daily Gazeti hili limeripotia sababu kuu za Uhuru kuwakataa majaji sita waliokuwa wamependekezwa na Tume ya Huduma za Mahakama (JSC) kujiunga na Mahakama ya Rufaa.
Kulingana na People Daily, majaji hao walikataliwa kutokana na namana wamekuwa wakisimamia kesi kadhaa ikiwemo ulanguzi wa dawa za kulevya iliyohusisha familia ya Akasha na kesi zingine za kigaidi.
Katika kujitetea, Uhuru alisema uamuzi wake ni kuhusiana na masuala ya kimaadili.
Majaji hao pia wanasemekana kupokea hongo na kuachilia washukiwa wa kigaidi na dhamana.
Wale waliokataliwa ni ikiwemo George Odunga, Joel Ngugi, Weldon Korir na Aggrey Muchelule.
Wengine ni Evans Makori na Judith Cheruiyot ambao walikuwa wamependekezwa kujiunga na wenzao katika Mahakama Kuu.
Kuhusu kesi ya Akasha, inaaminika kuwa mahakama hiyo iliweka doa kwenye utendakazi wa idara ya mahakama kwa kutumia ujanja katika kuamua kesi hiyo.
Kaka hao ambao walikuwa wamehamishwa Kenya walipatikana na hatia nchini Marekani na kufungwa jela.
Hatua ya Uhuru kuwaapisha majaji 34 pekee kati ya 40 waliopendekezwa ilizua hasira akishtumiwa kuweka mfano mbaya nchini.
Wengine walisema rais anawadhibu majaji ambao walifuta mswada wa BBI.
Majaji 34 waliapishwa Ijumaa, Juni 4, katika hafla iliyoandaliwa katika Ikulu ya Nairobi na kuongozwa na rais.
Jaji Mkuu Martha Koome alimwandikia Uhuru barua akimtaka kuwateua majaji hao sita.
4. Taifa Leo Taifa Leo inawangazia wanaopania kumrithi Uhuru mwaka ujao.
Gazeti hili limeripotia namna Uhuru anajaribu kumuiga baba yake Mzee Jomo Kenyatta na Daniel Moi wakati walikuwa wanawanoa warithi wao.
Viongozi hao wa zamani walikuwa na mbinu ya kuwahangaisha wakosoaji wa serikali yao.
Tangu ya salamu za maridhiano kati ya Raila na Uhuru, wandani wa Ruto wamekuwa wakijipata pabaya kwa kumkosoa rais.
Washirika wa Ruto wameadhibiwa bungeni na kupoteza nyadhifa zao kwa wale ambao wanamuegemea Uhuru na serikali yake.
Baadhi yao ni maseneta Kipchumba Murkomen (Elgeyo Marakwet), Susan Kihika (Nakuru), Irungu Kang’ata (Murang’a) kati ya wengine.
Mbinu hiyo pia ilitumika wakati wa utawala wa Mzee Kenyatta na Moi ambapo viongozi walifutwa kazi na kuteswa kwa kuwa na msimamo tofauti dhidi ya serikali.
5. The Star Gazeti hili limeripotia uwezakano wa kumtimua Spika Justin Muturi ambaye amekuwa akipigana na pingamizi tangu kutawazwa kwake kuwa msemaji wa Mt Kenya.
Inaripotiwa kuwa baadhi ya wakosoaji wa Muturi wamekuwa wakifanya mkutano nyumbani kwa gavana mmoja katika eneo la Kati mwa Kenya kujadili mpango wa kumtimua Spika huyo wa Bunge la Kitaifa.
Muturi ameapa kuwa hatatishwa na njama ya mahasidi wake.
READ ENGLISH VERSION
Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia [email protected] au WhatsaApp: 0732482690.