Magazeti Alhamisi, Agosti 12: Uhuru amchagua rasmi Raila kama mrithi wake 2022

Magazeti ya Alhamisi, Agosti 12, yameipa kipaumbele siasa za urithi za mwaka 2022 huku Rais Uhuru Kenyatta akimuunga mkono kiongozi wa ODM, Raila Odinga kuwania urais.

Magazeti haya pia yameripotia kuvuliwa mamlaka kwa Gavana wa Kilifi, Amason Kingi kama mwenyekiti wa ODM eneo hilo na kutwaliwa na Mbunge wa Ganze, Teddy Mwambire.

1. Daily Nation Chapisho hili linaripotia kuwa Rais Uhuru alimchagua rasmi Raila kama mrithi wake wakati wa mkutano wa faragha katika Ikulu ya Mombasa.

Kiongozi wa taifa anaripotiwa kuwaomba vinara wa muungano wa One Kenya Alliance (OKA) kuzima azima zao za kuwania urais 2022 na kumuunga mkono Raila.

Uhuru alihoji kuwa Raila ndiye chaguo bora kukabiliana na Ruto ambaye pia anamezea mate kiti hicho.

Hata hivyo, wafuasi wa viongozi wa Wiper, Kalonzo Musyoka, Musalia Mudavadi(ANC) na wa Ford Kenya, Moses Wetangula wameapa kutomuunga mkono Raila.

Duru kutoka mkutano huo zilifichua kuwa Uhuru alikuwa na wasiwasi ya namna atawaunganisha vinara wa OKA akiwemo Gideon Moi, na Raila.

2. The Standard Gazeti hili linaripoti kuwa Waziri wa Usalama wa Ndani, Fred Matiang'i alikanusha madai kuwa idara za usalama zinatumika kuwanyanyasa baadhi ya wanasiasa.

Matiang'i alipuzilia mbali madai kuwa polisi wanatumika kisiasa akisema hakuna chochote ambacho kitamzuia kutekeleza wajibu wake wa kuhakikisha taifa liko salama.

Katika kujibu madai yaliyotolewa na Ruto kuwa maafisa wa polisi wanatumika kumhangaisha pamoja na wandani wake, Matiang'i, bila kutaja majina alisisitiza kuwa hatasumbuliwa na yeyote.

"Hakuna presha yoyote na kelele zitawazuia kutekeleza wajibu wa kuhakikisha kuwa taifa liko salama," aliwaambia maafisa.

3. The Star Gazeti hili linaripoti kuwa wandani wa Ruto wanataka Bunge kufanyia marekebisho sheria kuhusu uhalifu ili kuwazuia polisi na maafisa wa DCI kuwakamata washukiwa siku za Ijumaa.

Walisema Kamata Kamata Ijumaa, hukiuka haki za kibanadamu na kurudisha taifa nyuma katika wakati ambapo washukiwa walikuwa wakikamatwa na kuzuiliwa bila kufikishwa kortini.

Hii ni kufuatia kukamatwa kwa baadhi ya wandani wa Naibu Rais siku za Ijumaa na kulazimika kukesha kwenye seli ya polisi hadi Jumatatu.

Read also

Magazeti Jumatatu, Agosti 9: Njama Mpya Kuahirisha Uchaguzi Mkuu Hadi 2023

Viongozi hao pia wanataka mahakama kukomeshwa kuachilia washukiwa kwa dhamana kubwa.

4. People Daily Mgogoro unatokota Bungoma kati ya serikali kuu na bunge la kaunti baada ya bajeti kupunguzwa kwa KSh 120 milioni.

Kufuatia hatua hiyo, wafanyakazi wa bunge la kaunti hiyo ambao wanaungwa mkono na madiwani wamekuwa wakifanya maandamano.

Hata hivyo, katibu mkuu wa Chama cha Wafanyakazi wa Serikali za Kaunti (KCGWU) tawi la Bungoma, Florian Ngangah na mwenyekiti wao Evans Manyilila walisema wafanyakazi hao wanatumiwa na madiwani kupiga vita serikali kuu.

5. Taifa Leo Taifa Leo linaripoti kuwa Wakenya wanatarajiwa kugharamika zaidi huku bei za bidhaa muhimu zikitazamiwa kupanda kuanzia Oktoba 1.

Mamlaka ya Ukusanyaji wa Ushuru (KRA), Jumanne, Agosti 10, ilitangaza kuwa itaongeza ushuru wa bidhaa hizo kwa 4.97%.

Miongoni mwa bidhaa hizo ni pombe, mafuta ya petroli, maji ya chupa, sigara na pikipiki.

Kwa mfano ushuru ambao utatozwa bei ya kununua pipikiki itaongezeka kutoka KSh 11,600 hadi KSh 12,185.