Magaidi 44 wa Al Shabaab wauawa na wanajeshi Somalia

Wizara ya Habari ya Somalia imetangaza kuwa, takriban magaidi wengine 44 wa al Shabaab wameuawa katika operesheni inayoendelea ya kupambana na magaidi hao wakufurishaji katika eneo la Lower Shabelle la kusini mwa nchi hiyo.

Taarifa hiyo imesema kuwa, operesheni hiyo imefanyika katika eneo la Kurtowarey ambao ni mji mdogo ulioko umbali wa kilomita 208 kusini magharibi mwa mji mkuu Mogadishu. "Jeshi la Somalia kwa kushirikiana na washirika wake ndio walioendesha operesheni hiyo kwa mafanikio makubwa," imeongeza taarifa hiyo.

Taarifa hiyo imemnukuu Naibu Waziri wa Habari wa Somalia Abdirahman Yusuf Adala akithibitisha habari hiyo na kuongeza kuwa, makamanda wakuu wa al Shabaab ni miongoni mwa magaidi waliouawa katika operesheni hiyo.

Vikosi vya usalama vya Somalia vimekuwa vikiendesha operesheni dhidi ya al Shabaab tangu mwaka jana baada ya Rais wa Somalia Hassan Sheikh Mohamud alipotangaza "vita vya pande zote" dhidi ya genge hilo. Kundi hilo limekuwa likipigana na serikali ya Somalia inayosaidiwa na askari wa Umoja wa Afrika tangu mwaka 2007.