Machakos: Agnes Kavindu Muthama aapishwa rasmi kuwa seneta

- Kiti cha useneta cha Machakos kiliwachwa wazi kufuatia kifo cha mwanasiasa Boniface Kabaka mwezi Disemba mwaka wa 2020

- Agnes Kavindu aliibuka mshindi katika uchaguzi mdogo uliofanywa Machi 9, 2021 na kwa sasa ameapishwa rasmi kuwa seneta wa kaunti hiyo

-Kavindu alimshinda mpinzani wake wa karibu Urbanus Ngengele wa UDA kwa kujizolea kura 104, 352, Ngengela alipata kura 19, 726

Agnes Kavindu Muthama ameapishwa rasmi kuwa seneta wa kaunti ya Machakos baada ya uchaguzi mdogo kufanywa wiki jana kufuatia kifo cha seneta Boniface Kabaka.

Hafla ya kuapishwa kwa Kavindu ilifanyika Jumanne, Machi 23 majira ya asubuhi ambapo viongozi kadha akiwemo Kalonzo Musyoka, seneta wa Makueni Mutula Kilonzo na mwenzake wa Kirui Enoch Wambua walishuhudia akila kiapo.

Kavindu aliibuka mshindi wa kiti cha useneta wa Machakosi katika uchaguzi mdogo ulioandaliwa Machi 9, 2021.

Baada ya shughuli ya upigaji kura kukamilika, Kavindu alimshinda mpinzani wake wa karibu Urbanus Ngengele wa UDA kwa kujizolea kura 104, 352. Ngengela alipata kura 19, 726.

Spika wa bunge la kitaifa Kenneth Lusaka ndiye aliyeongoza hafla ya kuapishwa kwa Kavindu ambapo pia alimkaribisha rasmi bungeni.

Kiti cha useneta wa Machakos kiliwachwa wazi kufuatia kifo cha seneta Boniface Kabaka mwezi Disemba mwaka jana katika hali tatanishi.

Kulingana na taarifa ya polisi Seneta huyo alikimbizwa hospitalini baada ya kuzirai katika nyumba ya mwanamke mmoja aliyedaiwa kuwa mpenzi wake mtaani Kilimani jijini Nairobi.

Hata hivyo, familia ya Kabaka baadaye ilifutilia mbali taarifa hizo ikizitaja kuwa potovu.

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia [email protected] au WhatsaApp: 0732482690.

Tazama habari zaidi hapa TUKO.co.ke