Liberia:Chama cha rais George Weah chadai upinzani uliiba kura

Chama cha Rais wa Liberia George Weah, Muungano wa Mabadiliko ya Kidemokrasia (CDC), kimedai kuwa upinzani uliiba kura ya marudio ya urais wiki iliyopita.Hata hivyo, kimesema licha ya kuibua suala hilo haitalizidisha kuwa mzozo kwani chama hicho kilitaka kudumisha umoja nchini Liberia.

Rais Weah alikubali Ijumaa jioni mara ilipobainika kuwa mpinzani wake, Joseph Boakai, alikuwa na uongozi mdogo lakini usioweza kupingwa.

Matokeo ya mwisho, yaliyotolewa Jumatatu, yalionyesha kuwa alishinda kwa zaidi ya kura 20,000.

Makundi ya waangalizi wa uchaguzi wa ndani na kimataifa, ikiwa ni pamoja na kutoka jumuiya ya kikanda ya Ecowas na Umoja wa Ulaya, yote yalitangaza uchaguzi huo kuwa huru, wa haki, wa uwazi na wa kuaminika.

Lakini Katibu Mkuu wa CDC Jefferson Koijee aliambia mkutano wa wanahabari Jumatano jioni kwamba chama chake kilikuwa na uthibitisho kwamba upinzani uliingilia kati kura hiyo ili kupata ushindi .

"Tuna ushahidi wa kitaalamu kwamba uchaguzi uliibiwa," alisema.

Alitoa folda ambayo alisema kulikuwa na karatasi za kujumlisha kutoka kwa hesabu 21 ambazo zilionyesha kuwa kulikuwa na ujazo wa kura.Waandishi wa habari hawakuweza kuona ushahidi.

Chama cha Unity Party cha Bw Boakai bado hakijajibu madai hayo.

Katika hotuba yake iliyosifiwa na wengi wiki jana, Bw Weah alisema "watu wa Liberia wamezungumza na tumesikia sauti yao"

Lakini aliongeza kuwa CDC itasalia kuwa upinzani mkali.Anatarajiwa kuachia ngazi Januari.