Kikosi maalum cha DCI chaundwa kuchunguza mauaji ya jamaa waliotoweka Kitengela

- Wanaume hao wanne wote walikuwa katika biashara ya kukodisha magari na ilishukiwa kuwa huenda kulitokea mgogoro katika biasshara na kupelekea kwa mauaji yao

- Wanne hao walitekwa nyara muda mfupi baada ya kushiriki mlo katika hoteli moja mtaani Kitengela

- Familia ya Elly Obuong na Benjamin tayari imetaitambua miili ya wapendwa wao

- Hata hivyo familia ya Jack Ochieng ilisema kwamba mwili uliopatikana Mathioya hakuwa wa mpendwa wao

Idara ya Upelelezi wa Makosa ya Jinai (DCI) imeunda kikosi maalum kuchunguza mauaji ya marafiki watatu wa Kitengela ambao walipatikana wameaga dunia Alhamisi, Aprili 29.

Kikosi hicho kiliundwa chini ya maagizo ya Inspekta Jenerali wa Polisi Hillary Mutyambai ambaye ametaka uchunguzi wa kina juu ya mauaji ya kutatanisha ya Elly Obuong, Benjamin Imbai, na Jack Ochieng.

Polisi bado hawajapata mahali alipo Brian Odor, rafiki wa nne ambaye alikuwa na marehemu na kabla ya kutekwa nyara na kuuawa.

Wanaume hao wanne wote walikuwa katika biashara ya kukodisha magari na ilishukiwa kuwa huenda kulitokea mgogoro katika biasshara na kupelekea kwa mauaji yao.

Akiongea Ijumaa, Aprili 30, katika hafla ya cadets katika Chuo cha Polisi cha Kitaifa huko Kiganjo, IG aliagiza timu ya DCI kuzindua upelelezi haraka juu ya tukio hilo la kusikitisha na kumpa ripoti.

"Asubuhi ya leo, niliamuru Idara ya DCI ichunguzesuala hili kwa kina. Timu hiyo tayari imeanza kazi yake," Mutyambai alisema.

Mwili wa Obuong ulikuwa wa kwanza kupatikana na wavunaji wa mchanga karibu na Mto Mukungai kwenye Barabara ya Murang'a Jumanne, Aprili 20, na kupelekwa katika makafani ya Murang'a.

Mwili wa marehemu baadaye ulitambuliwa na kakake Michael Amollo mnamo Alhamisi, Aprili 29, ambaye alisema kuwa mwili huo haukuwa na majeraha yoyote ulivyoonekana.

Mwili wa Imbai kwa upande mwingine ulipatikana katika chumba cha kuhifadhi maiti cha Thika ambapo ulikuwa umelazwa tangu Aprili 20.

Maafisa wa polisi walisema mwili wake ulipelekwa katika chumba cha kuhifadhi maiti, siku moja baada ya yeye na wale wengine watatu kutoweka.

Mabaki ya Jack Ochieng wakati uo huo, yalipatikana katika Mto Mathioya, mita chache tu kutoka ambapo mwili wa Elijah Obuong ulipatikana.

Read ENGLISH VERSION

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia [email protected] au WhatsaApp: 0732482690.