Kichanga chanusurika kuuawa na kiboko

Mtoto wa miaka miwili amenusurika kushambuliwa na kiboko karibu na nyumbani kwao kusini magharibi mwa Uganda.

Iga Paul alikuwa akicheza karibu na ufukwe wa Ziwa Edward wakati kiboko alipomshambulia.

Mnyama huyo alimnyakua mtoto huyo mchanga na "kumeza nusu ya mwili wake", polisi walisema na kuongeza kuwa mwanaume mmoja wa eneo hilo alipambana na kiboko huyo kwa kurushia mawe.

Mamlaka ya wanyamapori nchini Uganda imepinga kauli hiyo na kuiambia BBC kwamba mvulana huyo alishambuliwa badala ya kumezwa.

Kwa mujibu wa polisi, baada ya shambulio hilo lililotokea tarehe 4 Disemba, mtoto huyo alipelekwa katika kituo cha afya kilicho karibu ambako alitibiwa majeraha yake. Baadaye alihamishiwa katika Hospitali ya Bwera, ambako madaktari walimpa chanjo ya tahadhari ya kichaa cha mbwa.

Polisi walisema tukio hilo lilikuwa la kwanza kwa kiboko kupotea kutoka ziwani na kumshambulia mtu yeyote.

Lakini wanyama hao - ambao wanaweza kuwa na uzito wa tani 1.5 (kilo 1,500) - wanakadiriwa kuua karibu watu 500 kwa mwaka barani Afrika.

Na maafisa waliwaonya wenyeji kwamba wanyama hao wanaweza "kuona wanadamu kama tishio" na kusema kwamba "maingiliano yoyote yanaweza kuwafanya wafanye fujo". Viboko ni mamalia wa tatu kwa ukubwa wa nchi kavu na meno yao yanaweza kufikia urefu wa 50.8cm (inchi 20).

Licha ya ukubwa wao, wanaweza pia kufikia kasi ya hadi 20 mph (32 km / h). Ingawa wanyama ni wanyama wanaokula majani, wanaweza kuwa wakali sana wanapohisi kutishiwa au makazi yao yamevurugwa.