Kiambaa: DP Ruto akutana na aliyekuwa mgombea wa PEP kumaliza uhasama

- DP alikutana na Raymond ambapo walikubaliana kufanya kazi pamoja kuhakikisha UDA inapata ushindi Kiambaa

- Hatua ya DP imezua joto la kisiasa ndani ya kambi ya Rais Uhuru huku wandani wakiapa kuwa UDA haitafaulu kuwika Kiambaa

- Eneo bunge hilo lina umuhimu mkubwa kisiasa kwa Rais Uhuru na familia yake

Naibu Rais William Ruto anaendelea kuingiza mguu kwenye ngome ya kisiasa ya mdosi wake Rais Uhuru Kenyatta.

Macho ya DP Ruto kwa sasa yako katika eneo bunge la Kiambaa kaunti ya Kiambu ambapo anaunga mkono mgombea wa chama cha UDA.

Ruto anampigia debe John Njuguna Wanjiku ambaye anapeperusha bendera ya UDA dhidi ya mgombea wa Rais Uhuru Kenyatta Kariri Njama.

Jumanne Mei 25 DP alikutana na wafuasi wa chama cha Moses Kuria cha PEP wakiongozwa na aliyekuwa apeperushe bendera Raymond Kuria ili kutuliza njoto lililokuwa likiibuka kati ya pande hizo mbili.

Duru ziliarifu TUKO.co.ke kuwa kambi ya PEP chini ya Moses Kuria ilikerwa na hatua ya UDA ikiongozwa na wabunge Rigathi Gachagua na Kimani Ichung'wa kuwa na mgombea.

Kuria alitaka Kiambaa kuachiwa PEP akisema walikuwa na nafasi kubwa kunyakua kiti hicvho ikilinganishwa na UDA.

Hata hivyo, Ruto aliingilia kati na kumtuliza Kuria na ndipo akakubali chama chake kujiondoa kwenye kinyang'anyiro hicho.

"Nilifanya mazungumza mazti na mdosi wangu DP Ruto kuhusu suala hilo. Ili kuwafurahisha wenzangu Rigathi Gachagua na Kiamani Ichung'wa na pia kwa ajili ya umoja wa hustler nation, PEP haitakuwa na mgombea katika uchaguzi mdogo wa Kiambaa," Kuria alisema wakati huo.

Kiambaa ni mita chache tu kutoka nyumbani kwa Rais Uhuru Ichaweri ndani ya eneo bunge la Gatundu Kusini na hivyo kiti hicho ni umuhimu kwake.

Aidha aliyekuwa mbunge wa eneo hilo Paul Koinange ni jamaa wa familia ya Rais Uhuru na hivyo hatua ya DP huenda ikaongeza uhasama baina yake na wana wa Kenyatta.

TUKO.co.ke imepata duru kuwa wandani wa Rais pamoja na vigogo wa Jubilee wametakiwa kuhakikisha ushindi mkubwa Kiambaa.

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia [email protected] au WhatsaApp: 0732482690.

Tazama habri kemkem za TUKO