Wabunge wapya kutalii Bungeni
Wabunge wapya waliochaguliwa kwenye Uchaguzi Mkuu wa Agosti 9 nchini Kenya wanatazamiwa kupata mwelekeo wa Bunge kabla ya kufunguliwa tena kwa bunge mwezi ujao.
Taarifa ya karani wa Bunge la Kitaifa Serah Kioko imewafahamisha wabunge hao kwamba ziara ya utambulisho itafanyika Agosti 25 na Agosti 26.
Vikao elekezi vitajumuisha usajili wa Wanachama, ukusanyaji wa taarifa za bio-data, utoaji wa vitambulisho vya ubunge, kutoa taarifa kuhusu matumizi ya mfumo wa upigaji kura bungeni.
Katibu wa Bunge amesema kuwa itahusisha pia ziara ya Majengo ya Bunge na maelezo mafupi ya Ofisi ya Karani kuhusu mambo muhimu ya kisheria, pamoja na mambo mengine.
Kioko alidokeza kuwa Wabunge Wateule watafahamishwa tarehe watakayokutana kwa kikao cha kwanza mara tu Rais Uhuru Kenyatta atakapotangaza.
Watatembezwa kwenye Majengo ya Bunge na pia watapewa taarifa pamoja na mambo mengine huduma na vifaa vinavyopatikana kwa ajili ya Wajumbe pia watawezeshwa kujiandikisha kwa huduma na vifaa ikiwa ni pamoja na bima ya matibabu na huduma zingine zinazohusiana.