Jeshi lafuta shughuli zote za kisiasa Mali

Serikali ya kijeshi nchini Mali imetoa amri ya kusimamisha shughuli zote za kisiasa hadi itakavyotangazwa vinginevyo ikitoa hitaji la kuhifadhi utulivu wa umma, hatua inayofuatia uamuzi wa mwaka jana wa kusitisha uchaguzi kwa muda usiojulikana.

Msemaji wa serikali hiyo, Abdoulaye Maiga alisoma taarifa hiyo kwenye televisheni ya taifa Jumatano jioni, wakati nchi hiyo ikiadhimisha Eid al-Fitr, sikukuu ya kuadhimisha mwisho wa mwezi mtukufu wa Ramadhani ambapo Waislamu watiifu hufunga kuanzia alfajiri hadi jioni.

Mali imekumbwa na mapinduzi mawili tangu 2020, na kusababisha wimbi la machafuko ya kisiasa ambayo yameenea Afrika Magharibi na Kati. Nchi hiyo imepambana na uasi unaozidi kuwa mbaya wa vikundi vya jihadi vinavyohusishwa na Al Qaeda na kundi la Islamic State kwa zaidi ya muongo mmoja.

Kanali Assimi Goita, ambaye alichukua wadhifa huo baada ya mapinduzi ya pili mwaka 2021, aliahidi kuirejesha nchi kwenye demokrasia mapema 2024. Lakini mnamo Septemba, serikali ya kijeshi ilifuta uchaguzi uliopangwa kufanyika Februari 2024 kwa muda usiojulikana, akitaja haja ya maandalizi zaidi ya kiufundi.