Gavana apigwa 'stop' safari za Marekani

Aliyekuwa Gavana wa Nairobi Mike Sonko na jamaa zake wa karibu wamepigwa marufuku kuingia Marekani kwa madai ya ufisadi na matumizi mabaya ya ofisi.

Kulingana na tangazo la Jumanne la Mshauri wa Masuala ya Umma Eric Watnik katika Ubalozi wa Marekani jijini Nairobi, marufuku ya Sonko kutoka Marekani inatokana na "kuhusika katika ufisadi mkubwa" katika kipindi kifupi cha utumishi wake katika Jumba la Jiji.

Watnik alisema Wizara ya Mambo ya Nje imemtangaza Sonko, mkewe Primrose Mbuvi, binti zake Saumu na Salma na mwanawe wa umri mdogo kuwa hawastahiki kuingia Marekani. Uteuzi huo unamaanisha kuwa pia wamepigwa marufuku kufanya biashara yoyote na Marekani.

"Ufisadi wake (Sonko) umeripotiwa sana katika vyombo vya habari vya ndani na kimataifa. Kwa uteuzi huu idara inathibitisha hitaji la uwajibikaji, uwazi na heshima ya utawala wa sheria katika taasisi za kidemokrasia za Kenya, michakato ya serikali na vitendo vya maafisa wa umma," Watnik alisema.