ECOWAS yapigilia msumari sakata la Sonko Senegal

Mahakama ya kikanda ya Jumuiya ya Kiuchumi ya Nchi za Afrika Magharibi siku ya Ijumaa imetoa uamuzi wake kuhusiana na jaribio la kiongozi wa upinzani nchini Senegal anayefungwa Ousmane Sonko kurejea kwenye kinyang'anyiro cha urais, huku hatima yake ikiwa mikononi mwa majaji wa nchi yake.

"Senegal haijakiuka haki zake zozote," imebainisha Mahakama ya Haki ya Jumuiya ya Kiuchumi ya Afrika Magharibi (ECOWAS) huko Abuja, mji mkuu wa Nigeria.

Mawakili wa Bw. Sonko waliwasilisha malalamiko yao kupinga kuondolewa kwake katika orodha ya wapiga kura na wagombea nchini Senegal baada ya kupatikana na hatia katika kesi ya maadili. Kuondolewa huku kunafanya kugombea kwake kwa uchaguzi wa urais wa Februari 2024 kutowezekana, ambapo angekuwa mmoja wa wagombea wakuu.

Uamuzi wa Abuja unakuja siku ambayo, mjini Dakar, Mahakama ya Juu pia inajadili kurejeshwa kwa Bw. Sonko kwenye orodha ya wapiga kura, utaratibu unaozingatiwa na wengi kuwa nafasi ya mwisho ya mpinzani kushiriki katika uchaguzi huo.

"Mahakama ya Haki ya ECOWAS inampa Macky Sall (rais wa Senegal) idhini ya kumwangamiza mpinzani wake," amejibu Wakili Juan Branco, mmoja wa mawakili wa Bw. Sonko.

Kesi hiyo mjini Dakar imefunguliwa Ijumaa asubuhi katika Mahakama ya Juu ambayo ilionekana kama kambi iliyokita mizizi, ikilindwa na jeshi la polisi, alibainisha mwandishi wa habari wa AFP. Inahusiana na rufaa ya Serikali iliyopinga kubatilishwa mwezi uliopita na jaji wa Ziguinchor (kusini) ya kuondolewa Bw. Sonko kwenye orodha za uchaguzi. Mawakili kutoka kambi zote mbili, wanaharakati wa upinzani na maafisa wa polisi wako katika chumba kidogo cha mahakama.

Mvutano wa kisiasa

Mzozo wa Bw. Sonko na Serikali katika kesi kadhaa za kisiasa na mahakama umeiweka Senegal katika mashaka kwa miaka miwili na nusu na kusababisha machafuko mabaya zaidi kuwahi kutokea nchini humo kwa miaka mingi. Yeye na mawakili wake wameendelea kukashifu njama ya kumuondoa kisiasa.