DRC: Baadhi ya askari wa Afrika Kusini warejeshwa kwao

Jeshi la Afrika Kusini limewaamuru kurudi nyumbani kwa kundi la wanajeshi wake, wanaotuhumiwa kwa utovu wa nidhamu unaohusiana na unyanyasaji wa kingono nchini DRC, hadi uchunguzi ufanyike.

Wanane hao, ni sehemu ya ujumbe wa kulinda amani wa Umoja wa Mataifa nchini DRC, MONUSCO, na walikuwa wanazuiliwa tangu juma lililopita, kwenye kambi yao iliyoko mjini Beni mashariki mwa nchi.

Kwa mujibu wa taarifa iliyotolewa na jeshi la Afrika Kusini, uzito wa tuhuma zinazowakabili ndio umechangia kuchukua uamuzi wa kuwarudisha nyumbani kwa mahojiano zaidi.

Wanajeshi hao wanatuhumiwa kwa utovu wa nidhamu unaohusiana na unyanyasaji wa kingono nchini DRC, hadi uchunguzi ufanyike

Msemaji wa Umoja wa Mataifa Stephane Dujarric alisema MONUSCO ilipokea ripoti ya wafanyakazi waliohusika na kwamba walishiriki vitendo hivyo baada ya saa za amri ya kutotoka nje, katika baa moja inayojulikana kuwa mahali ambapo wanawake hujiuza.

Aidha jeshi la Afrika kusini limesema halikutaarifiwa mapema kuhusu tuhuma hizo, hadi ilipoona zimechapishwa na vyombo vya habari.