Benin: Rais amchagua mkuu idara ya ujasusi kama mjumbe nchini Haiti

Mkuu wa nchi wa Benin Patrice Talon amemteua Pamphile Zomahoun kwa wadhifa wa mjumbe maalum wa Benin nchini Haiti. Benin imejitolea kwa hiari kutoa wanajeshi 2,000 kwa kikosi cha siku zijazo cha usaidizi wa usalama wa kimataifa nchini Haiti (MMSS). Uteuzi wa mjumbe maalum kwa Haiti ni hatua zaidi katika utekelezaji wa mradi wa kupeleka vikosi vya Benin huko Port-au-Prince.

Taarifa ya Baraza la Mawaziri ambalo linatangaza uteuzi wake haisemi chochote kuhusu barua yake ya misheni nchini Haiti, lakini dharura yake ya kwanza itakuwa kuandaa kuwasili kwa wanajeshi 2,000 wa Benin.

Washiriki wake katika misheni hii watakuwa Wahaiti na washirika wa kimataifa kama vile Marekani, Brazili, Canada na Jamaica, wadau wote katika uanzishwaji wa kikosi cha kimataifa. Kazi ya kikosi cha Benin inajulikana.

Wanajeshi 2,000 hasa wanatoka katika vikosi vya jeshi vya Benin, yaani jeshi la nchi kavu, jeshi la anga, jeshi la wanamaji na kikosi cha walinzi wa kitaifa. Inawezekana kwamba idadi ndogo sana ya maafisa wa polisi watakamilisha kikosi hicho ambacho, kabla ya kuondoka kuelekea Port-au-Prince, kitanufaika na mafunzo yanayotolewa na wakufunzi wa Benin na wageni.

Bado haijajulikana ratiba ya utumaji wa kikosi hiki. Ufadhili unaripotiwa kuwa unaendelea na, kulingana na habari zetu, wahusika wakuu katika operesheni hiyo wanaandaa mkutano mkubwa katika siku zijazo.

Pamphile Zomahoun atachukua majukumu yake haraka, chanzo kimoja kinabaini. Akiwa na umri wa miaka 53, yeye ni kanali katika kikosi cha askari jeshi, aliyefunzwa huko Saint-Cyr na Melun, nchini Ufaransa.