Aliyekuwa mfuasi wa Mackenzie aibuka na madai ya kutisha kuhusu itikadi zake

Imeibuka kwamba kufa lilikuwa jambo la kawaida katika dhehebu la Paul Mackenzie huku aliyekuwa mfuasi wake akiyafichua mambo mazito.

Aliyekuwa mfuasi wa mhubiri huyo mwenye utata alifichua jinsi watoto waliokataa amri ya kufunga hadi kufa walivyotolewa uhai.

Mfuasi huyo wa zamani alidai kwamba katika kanisa hilo la Mackenzie kufunga hadi kufa kulichukuliwa ni jambo la kishujaa. Imeibuka kwamba kufa lilikuwa ni lengo kuu katika kanisa lenye utata la Paul Mackenzie.

Aliyekuwa muumini wa kanisa la Good News International, amefichua jinsi kifo kilivolazimishwa kwa wake waliokwenda kinyume na maagizo yake.

Akizungumza na runinga ya Citizen, muumini wa zamani wa Mackenzie alidai kwamba watoto waliokosa kufunga hadi kufa, walinyongwa hadi kufa au kutolewa pumzi kwa lazima.

Mwanamume huyo alifichua jinsi mazishi ya waathiriwa yangefanyika takriban kila siku na kusimamiwa na Mackenzie mwenyewe.

Kulingana naye, mafunzo ya Mackenzie yalienzi sana roho kuliko mwili.

"Wakiwa msituni, watu hawakuyathamini maisha yao kwa hivyo mazishi yalifanyika vivi hivi tu, kwa sababu kilichokuwa na umuhimu kwao ilikuwa ni roho zao ziende mbinguni. Watu wanafariki kila siku na wakati mwingine tulikuwa tukitayarisha makaburi tukisubiria mtu afe," mfuasi huyo wa zamani alisema.

Muumini huyo wa zamani wa Mackenzie pia alisema wakati wa mazishi, hapakuwa na fursa ya kuomboleza kwa sababu vifo hivyo vilionekana kuwa ni vya kishujaa.

"Watu hawakuwa wanaomboleza kwa sababu ilichukuliwa kuwa ni jambo la kishujaa kwa mtu kufunga hadi kufa. Waliodaiwa kuwa ni mashujaa," mwanamume huyo aliongeza kusema.