Vodacom yaipongeza Simba kutwaa ubingwa

KAMPUNI ya simu za mkononi Vodacom Tanzania, ambayo ni mdhamini mkuu wa Ligi Kuu Tanzania Bara wameipongeza timu ya Simba kwa kutwaa ubingwa wa ligi hiyo msimu huu 2019/2020. Pia kampuni hiyo imezipongeza timu zote zilizoshiriki VPL msimu huu.

Katika taarifa yake kwa vyombo vya habari, Mkurugenzi wa Kitengo cha Biashara wa Vodacom, Linda Riwa, alisema mpira wa miguu ni mchezo pendwa na muhimu sana hapa nchini na duniani kote.

"Tunajivunia sana kuwa sehemu ya Ligi Kuu ya Tanzania Bara, kwani inaendelea kukua na kuboreshwa mwaka hadi mwaka. Pongezi zetu pia ziwaendee viongozi wa Shirikisho la Mpira wa Miguu Tanzania (TFF), Bodi ya Ligi, klabu zote shiriki, waandishi wa habari, wadhamini wenza pamoja na Watanzania wote kwa ujumla kwa kushiriki kikamilifu katika Ligi Kuu mwaka huu," alisema Riwa.

Alisema hiyo ni katika kuwapa burudani wateja wa Vodacom na Watanzania kwa ujumla, kutoa nafasi za ajira kwa wachezaji na watendaji pamoja na kujenga umoja na mshikamano miongoni mwa jamii na nchi tofauti.

"Kama mnavyojua mpira wa miguu ni fursa kubwa ya ajira kwa vijana na tunafurahi na kujivunia kuwa sehemu ya mafanikio tunayoyaona kutokana na udhamini wetu ambao umewezesha baadhi ya wachezaji kama Mbwana Samatta na Simon Msuva kupata fursa za kucheza nchi za nje na kufika ulaya," aliongeza Linda ambaye alimwakilisha Mkurugenzi Mtendaji wa Vodacom Tanzania