Siondoki ng'o! Solskjaer atia ngumu kuondoka OT baada ya kichapo cha aibu

Ole Gunnar Solskjaer amevunja kimya chake kufuatia kichapo cha aibu cha Man United cha 5-0 kutoka kwa Liverpool.

Ole Gunnar Solskjaer amekuwa asukumiwa presha ajiuzulu kama kocha wa Man United baada ya kuongoza klabu hiyo kusajili msururu wa matokeo duni.

Kichapo kikubwa cha United wikendi mikononi mwa Liverpool inamuwacha raia huyo wa Norway akiwa na hatima finyu kama kocha wa klabu hiyo. Mashabiki wengi kupitia mtandao wa kijamii tayari wameanzisha kampeni ya kumtimua meneja huyo wakidai hafai kuwa katika wadhifa huo.

Hata hivyo, kocha huyo amedokeza kuwa hatabanduka akiwa na matumaini ya kurejesha timu yake kwenye mtindo wao wa kuvuna ushindi.

United, ambao wamekuwa na wakati mgumu wiki zilizopita walishushwa kimchezo ugani Old Trafford huku wakipata kichapo kikubwa katika historia yao ya soka.

Metro UK inaripoti kuwa ushinde huo unamuwacha Solskjaer akizidishiwa presha ya kupigwa kalamu, akilemewa kusajili matokeo bora tangu kuanza kwa msimu mpya.

Bado Mashetani Wekundu hawajashinda taji lolote tangu Solskjaer alipoteuliwa kuwa meneja, lakini raia huyo wa Norway amesema hatajiuzulu.

"Nimetoka mbali sana, tumefika mbali kama kikundi. na hatuwezi kukata tamaa sasa," Solskjaer alisema.

"Itakuwa ngumu. Wachezaji watakuwa chini lakini kuna wahusika wengi huko. Tunajua sisi tuko chini, hatuwezi kuhisi mbaya zaidi kuliko hii. Wacha tuone ni wapi tunaelekea," aliongeza.

Akizungumzia kichapo cha timu yake, Solskjaer alikiri makosa yake akikubali kuwa United walifanya makosa makubwa yaliyochangia kutandikwa kwao.

"Hatukuwa binafsi na kama timu, hatuwezi kuipa timu kama Liverpool nafasi hizo lakini kwa bahati mbaya tulifanya hivyo," alibainisha

United watajiandaa kwa mechi nyingine ya Jumamosi, Oktoba 30, dhidi ya Tottenham Hotspur ambao pia wanakumbana na masaibu licha ya kuanza msimu mpya kwa matao ya juu.

Kufutia kupokezwa vichapo katika mechi zao za awali, timu zote zitakuwa makini kufufua makali yao kwenye mechi hiyo.