Simba Queens yaota ubingwa Afrika

UONGOZI wa Simba Queens umeazimia msimu ujao uwe tishio zaidi kwa kuhakikisha wanachukua ubingwa wa Afrika.

Hayo yalisemwa na mlezi wa timu hiyo, Fatema Dewji kwenye hafla ya kuipongeza kwa kuwa mabingwa wa Ligi Kuu Wanawake Tanzania Bara.

Fatema alisema wanaweza kufanikiwa zaidi kwa kuweka juhudi na ubunifu kama walivyofanya kwenye ligi ya nyumbani.

“Mmecheza kwa ubunifu na juhudi ningependa kuona msimu ujao mnafanya vizuri katika ngazi ya kimataifa na anatamani kuiona timu hiyo inajitegemea kama ilivyo malengo ya timu kubwa ya wanaume,” alisema.

Dewji ambaye ni dada wa mwekezaji wa klabu ya Simba, Mohamed Dewji aliwashukuru wote waliohusika katika maendeleo ya soka la wanawake ikiwemo Wizara ya Habari, Utamaduni, Sanaa na Michezo na kuomba waendelee kuziunga mkono timu za wanawake ili zipeperushe vyema bendera ya nchi kimataifa msimu ujao.

Naye Mjumbe wa Bodi ya Wakurugenzi Simba, Asha Baraka aliwapongeza wachezaji na benchi la ufundi na kuwaahidi kuwa bodi imeandaa mambo mazuri dhidi ya timu hiyo, huku akihimiza mashabiki wawe wanajitokeza kwa wingi viwanjani kuwaunga mkono.

Wadhamini wa timu hiyo kwa kushirikiana na Dewji walitoa zawadi ya fedha kwa timu, Sh milioni 6.5.

Pia, wachezaji waliofanya vizuri wamepewa tuzo na fedha taslimu Sh 350,000 ambao ni mfungaji bora wa klabu Oppa Clement, golikipa bora Janeth Simba, mchangiaji bora wa pasi za mabao Mawete Flavine na mchezaji bora ni Julieth Singano.