Mwanariadha wa Kenya Philemon apigwa marufuku kisa dawa za kusisimua misuli

Mwanariadha wa Kenya wa mbio za marathon Philemon Kacheran Lokedi amepigwa marufuku ya miaka mitatu baada ya kugundulika kutumia dawa iliyopigwa marufuku.

Mchezaji huyo mwenye umri wa miaka 30 alirejesha matokeo chanya ya "testosterone ya asili ya nje" katika jaribio lisilo la ushindani mwezi Aprili.

Kacheran aliondolewa katika timu ya Kenya kabla ya Michezo ya Jumuiya ya Madola mjini Birmingham, na anakuwa Mkenya wa tisa kupigwa marufuku na Kitengo cha Uadilifu cha Riadha (AIU) tangu mwanzoni mwa Julai.

Kipindi chake cha kutostahiki kimerejeshwa hadi tarehe 8 Julai, tarehe ya kusimamishwa kwake kwa muda.

Kacheran alikuwa amekabiliwa na marufuku ya miaka minne lakini alipunguziwa mwaka mmoja kwa sababu ya "kukiri mapema [hatia] na kukubali kuwekewa vikwazo", ilisema AIU.

Kacheran alimaliza wa nane katika mbio za Rotterdam Marathon mwezi Aprili, lakini alikimbia muda wake bora zaidi wa saa mbili dakika tano sekunde 19 alipomaliza wa tatu katika mbio za Valencia Marathon mwezi Desemba mwaka jana.

Lawrence Cherono, ambaye alishinda mbio za Boston na Chicago marathon mwaka wa 2019, ndiye mchezaji mashuhuri zaidi kati ya Wakenya tisa waliopigwa marufuku mwaka huu.

Alilazimika kujiondoa kwenye timu kwa ajili ya Mashindano ya Dunia ya mwaka huu, wakati tayari kwenye ukumbi wao huko Oregon, Marekani.

Mwezi uliopita, Lilian Kasait Rengeruk, ambaye alimaliza wa 12 katika fainali ya mita 5,000 kwenye Michezo ya Olimpiki ya mwaka jana huko Tokyo, alipigwa marufuku ya miezi 10 kwa matumizi ya dawa ya kutibu homoni ya Letrozole.

Kenya iliwekwa katika kitengo cha juu cha orodha ya utiifu ya Shirika la Kupambana na Matumizi ya Dawa Ulimwenguni mnamo 2016.