Mwamuzi Mtanzania aanza England

MWAMUZI Mtanzania Ericsson Temu, anayeishi nchini England ameanza kuchezesha mechi yake ya kwanza tangu alipofuzu vipimo vya afya.

Temu alikuwa mwamuzi wakati wa mchezo wa timu za vijana uliowakutanisha wenyeji Charlton Athletic FC waliokuwa wakicheza na Queens Park Rangers.

Baada ya mchezo huo, Temu alieleza furaha yake ya kupewa majukumu hayo huku akisema malengo makubwa ni kufanya vizuri ili kuendelea kuaminiwa.

“Wakati napewa taarifa za kuchezesha mchezo huo nilikuwa na furaha isiyoelezeka, lakini presha pia haikukosekana kwa sababu wenzetu huwa wanafuatilia sana waamuzi ingawa nashukuru nilifanya vizuri,” alisema.

Aliongeza kuwa anawashukuru wote waliofanikisha yeye kufika hapo alipo wakiwemo Shirikisho la Soka Tanzania (TFF) ambao walikuwa mstari wa mbele kumpa ushirikiano katika kila hatua aliyopitia.

“Haikuwa rahisi kupenya kwani England kutokana na wanavyochukulia siriaz kazi zao ila imewezekana naamini nitafanya kazi nzuri ambayo itazidi kunitangaza na kuniwezesha kupata nafasi ya kuchezesha michezo mikubwa hususani ya Ligi Kuu,” alisema.