Misururu mirefu ya mashabiki wakiingia Kirumba kuishuhudia Yanga dhidi Pyramids

Mwanza. Mashabiki wa Yanga wamejitokeza kwa wingi na kupanga foleni ndefu katika vituo vya kuuza tiketi vya Uwanja wa Furahisha, Kirumba na Nyamagana kushuhudia mechi kati ya timu yao dhidi ya Pyramids katika Kombe la Shirikisho Afrika.

Saa tatu kabla ya kuanza kwa mchezo huo foleni bado ni kubwa nje ya uwanja wa Kirumba kwa mashabiki kila moja akitaka kuingia uwanjani.

Mashabiki hao walikuwa wakisukumana kugombea nafasi ya kuingia haraka huku wengine wakiweka mgomo kumpisha yoyote nayetaka kukatisha kwenye foleni hiyo wakidai huwenda akachafua hali ya hewa kwa kuanzisha vurugu zisizo na msingi.

Hata hivyo, ikiwa ni tofauti na kipindi cha nyuma katika michezo ya Yanga dhidi ya timu za Mwanza makomandoo wa klabu hiyo huwa wanakaa getini, hii leo mambo yamekuwa tofauti kwani Askari Polisi ndio wanakagua tiketi.