Mashabiki Azam wawapiga chai Yanga

Mwanza. Mashabiki wa timu ya soka ya Azam jijini Mwanza wamewanunulia kifungua kinywa wenzao wa Yanga kwa  kuonyesha mshikamano na furaha ya ushindi wa bao 1-0 waliopata dhidi ya timu hiyo ha mitaa ya Jangwani na Twiga.

Tukio hilo lililivutia umati wa watu limetokea eneo la Stendi ya Igombe jijini Mwanza leo Aprili 26, 2021.

Huku wakihanikiza tukio hilo kwa kelele na maneno ya vijembe, mashabiki wa Azam wakiongozwa na Twaha Ramadhani Hashim wametaja sababu ya kufanya hivyo kuwa ni kuwapoza machungu wenzao wa Yanga ambao baadhi yao walilala njaa bila kula usiku wa kuamkia leo kutokana na huzuni na machungu ya kupoteza mtanange huo wa ligi kuu Tanzania Bara ulipigwa Uwanja wa Taifa mkoani Dar es Salaam.

Msosi huo wa bure ulikuwa wazi kwa mwanachama, mpenzi na shabiki yeyote wa Yanga huku baadhi ya vijana wanaoaminika kuwa wapenzi wa watani wa jadi wa Yanga, Sinba Sports Club wakizunguka eneo lote la stendi kuwasaka wenzao wa Yanga na kuwasogeza eneo la msosi.

Sehemu kubwa ya walioshiriki tukio hilo ni madereva, makondakta na wapiga debe wa magari yanayosafiri kati ya Uwanja wa Ndege, Nyegezi, Malimbe, Butimba, Mahina na Uchelele, bila kuwasahau wafanyabiashara ndogondogo maarufu kama Wamachinga.