Kwasi mapema tu atua Dar

Dar es Salaam. Beki kiraka wa Simba, Asante Kwasi amerejea nchini jana Jumapili akitoka kwao Ghana tayari ya maandalizi ya msimu mpya wa Ligi Kuu Bara unaotarajiwa kuanza Agosti.

Nyota wote wa kikosi cha kwanza wa Simba wamepewa likizo na kila mmoja yupo nchini kwao, lakini Kwasi tayari ameshaingia nchini kwa ajili ya kazi.

"Nimerudi mapema tu hapa Tanzania ili kuendelea na mapumziko yangu, lakini sitajishughulisha na soka hata kidogo maana ndio ninachotakiwa kufanya katika mapumziko yangu haya," alisema Kwasi.

"Nitapumzika lakini kabla ya kuanza maandalizi ya Ligi nitaanza mazoezi yangu binafsi yale ya kukimbia ufukweni na gym kidogo ili nitakapokutana na wenzangu niwe tayari kwa maandalizi," alisema Kwasi.

 

Wachezaji wengine wa kigeni na wale waliokuwa wanatumika katika kikosi cha kwanza wanatarajia kuanza kuingia hapa nchini baada ya mashindano ya Kombe la  Kagame yatakapomalizika Julai 13.