Askari na mashabiki hapatoshi Majimaji

UNAWEZA kusema ni kama muvi inachezwa hapa kwenye geti kubwa la kuingilia uwanja wa Majimaji Songea baada ya Maaskari na mashabiki wanaotaka kuingia kutokuelewana.

Mashabiki hao wanataka kuingia uwanjani kutazama mechi ya nusu fainali kombe la shirikisho kati ya Azam na Simba iliyopagwa kuchezwa kuanzia saa 9:30 jioni.

Picha linaanza mashabiki wamejaa getini kiasi kwamba hakuna sehemu ambayo Askari wanaweza kupenya kupita na kuegesha gari lao lakini wametumia mbinu tofauti ikiwemo kuwasukuma mashabiki na kufanikiwa kupaki gari moja.

Baada ya hapo mashabiki bila wasiwasi wameendelea kupanga foleni mbele na nyuma ya gari la Askari huku baadhi ya Askari wakishuka kutuliza mihemko ya mashabiki.

Hiyo yote inatokana na kuwa geti la kuingilia uwanjani hapo ambalo limefunguliwa ni hilo moja tu na baada ya mashabiki kuingia kwa nguvu na kwa wingi wakiwapita Askari, geti hilo lilifungwa tena na msongamano wa watu kuendelea kuwa mkubwa nje ya getti hilo.

Askari Polisi, FFU, Mgambo, Skauti na matrafiki wote wapo eneo hilo wakijaribu kuwazuia mashabiki ambao wote wamedhamiria kuingia ndani.

Kwa mara kadhaa maaskari wameonekana kutumia nguvu zaidi kuwatuliza mashabiki jambo linalofanya baadhi ya mashabiki kukimbia kwa makundi kama nyuki kisha kurejea.

Pamoja na mvutano huo lakini mashabiki bado hawajakata tamaa ya kuingia uwanjani hapo kwani bado wapo wengi na wamepanga mistari huku sura zao zikionekana kuwa za hasira, huruma na nyonge.