Dar es Salaam. Mwenyekiti wa Bodi ya Parole, Augustino Mrema jana amemaliza muda wake kuongoza bodi hiyo na kubainisha changamoto saba zinazotakiwa kufanyiwa kazi ili chombo hicho kitekeleze majukumu yake kwa ufanisi.
Aidha, amesema iwapo Rais ataona anafaa kuendelea kwa miaka mingine mitatu yupo tayari.
Parole ni utaratibu wa kisheria unaomwezesha mfungwa anayetumikia kifungo kirefu kuachiliwa kwa masharti maalumu kabla ya kifungo chake kumalizika na kwenda kutumikia sehemu ya kifungo kilichobakia kwenye jamii.
Mrema alieleza jana wakati wa mkutano na wanahabari uliofanyika nyumbani kwake, Salasala uliolenga kutoa shukrani kwa Rais John Magufuli na uongozi wa magereza kisha kueleza utendaji wa bodi hiyo katika kipindi cha Julai 16, 2016 hadi Julai 16 mwaka huu.
