Dar es Salaam. Chama cha Mapinduzi (CCM) kimekamilisha mchakato wa kumlipia faini ya Sh30 milioni mwanachama wa chama hicho, Dk Vicent Mashinji na kupewa kibali cha kwenda kumtoa gerezani.
Mashinji na viongozi wanane wa Chadema jana Jumanne Machi 10, 2020 walihukumiwa na Mahakama ya Hakimu Mkazi Kisutu kulipa faini ya Sh350 milioni au kwenda jela miezi mitano baada ya kukutwa na hatia katika mashtaka 12 kati ya 13 yaliyokuwa yakiwakabili.
Kutokana na jana jioni kushindwa kukamilisha taratibu za kulipa fedha hizo, walipelekwa katika gereza la Segerea, huku taratibu za kuwatoa zikifanywa na Chadema walioanza kuchangishana fedha huku CCM kupitia wa Katibu wa Itikadi na Uenezi, Humphrey Polepole wakieleza kuwa watachanga fedha kwa wanachama wake wa Dar es Salaam kutoa Mashinji.
Akizungumza leo Machi 11, 2020 katika Mahakama ya Hakimu Mkazi Kisutu Polepole amesema baada ya hukumu hiyo kutolewa jana viongozi na wanachama wa CCM Mkoa wa Dar es Salaam walianza utaratibu wakutafuta fedha hizo.
Amesema hadi leo asubuhi utaratibu huo ulikuwa umekamilika na walifika mahakamani kwa ajili ya kuelezwa taratibu.
"Tulifika asubuhi kwa ajili ya kupewa utaratibu namna ndugu yetu tutamnusuru na kifungo na utaratibu ni wa kielektroniki baada ya kupewa namba tumeenda kuweka fedha benki na kurudi kwa ajili ya kupewa kibali cha kwenda kumtoa gerezani.”
Habari zinazohusiana na hii
- VIDEO: Polepole aeleza mchakato wa kumtoa Dk Mashinji
- VIDEO: Polepole apeleka mahakamani faini ya Sh30 milioni ya Dk Mashinji
Happyness ambaye ni mke wake wa Dk Mashinji ameishukuru CCM kwa namna ilivyojitoa na kuonyesha ushirikiano kwa mumewe.
"Naishukuru CCM kwa umoja na ushirikiano waliouonyesha sikutegemea kama mambo yangeenda haraka hivi na Vicent ni mwanchama mpya,” amesema Happyness.
Mbali na Mashinji, washtakiwa wengine ni mwenyekiti wa Chadema, Freeman Mbowe.
Katibu mkuu wa chama hicho, John Mnyika; naibu katibu mkuu (Zanzibar), Salum Mwalimu; mbunge wa Iringa Mjini, Mchungaji Peter Msigwa; Esther Matiko (Tarime Mjini); Halima Mdee (Kawe); Ester Bulaya (Bunda) na John Heche (Tarime Vijijini).