Simba inaitaka rekodi nyingine CAF

Uongozi wa Simba, umeweka wazi kuwa, unahitaji kuweka rekodi nyingine kwenye Ligi ya Mabingwa Afrika baada ya kutinga hatua ya robo fainali.

Ahmed Ally, Meneja wa Idara ya Habari na Mawasiliano Simba, amesema kuwa rekodi ya kutinga robo fainali ni mafanikio ya Simba, hivyo wanahitaji kuweka rekodi nyingine.

Simba ipo Kundi C kwenye Ligi ya Mabingwa Afrika, inashika nafasi ya pili baada ya kukusanya pointi tisa nyuma ya Raja Casablanca wakiwa na pointi 13. Timu zote zimecheza mechi tano na kufuzu robo fainali.

Ally ameweka wazi kuwa, jitihada zinafanyika kwenye kila idara ambapo wachezaji wanatambua umuhimu wa timu hiyo kutinga katika hatua ya juu zaidi ya robo fainali.

“Ipo wazi kwamba mafanikio ya Simba kwenye Ligi ya Mabingwa Afrika yanaonekana na tumetinga hatua ya robo fainali mara nyingi, sasa ni wakati wa kuandika rekodi nyingine.

“Ushindani kwenye mashindano haya sio wa mchezo hasa ukizingatia kila timu inahitaji kufanya vizuri kwa kuwa tumefanikisha yale malengo ya kutinga robo fainali basi mipango inaanza kwenye hatua zinazofuata.

“Ila bado tuna mchezo mmoja mgumu dhidi ya Raja ambao nao wamefanikiwa kutinga hatua ya robo fainali, utakuwa mchezo mzuri kwetu, hivyo mashabiki wazidi kuwa pamoja nasi,” alisema.