Dilunga apewa masharti mapya Simba

Mabosi wa Simba wamemruhusu kiungo wao mshambuliaji Hassan Dilunga kuanza mazoezi ya pamoja na wenzake kwa makubaliano maalum ya kusaini mkataba mpya ndani ya timu hiyo kwa ajili ya msimu ujao.

Dilunga juzi alianza mazoezi ya timu hiyo mara bada ya kikosi hicho kuingia kambini kujiandaa na mchezo wa tano wa hatua ya Makundi Ligi ya Mabingwa Afrika watakaocheza kesho Jumamosi kwenye Uwanja wa Mkapa Jijini Dar es Salaam.

Kiungo huyo ambaye mkataba wake ulimalizika mwishoni mwa msimu uliopita kabla ya kupelekwa Afrika Kusini ambako alikwenda kufanyiwa operesheni ya goti kabla ya kupona kujiunga na timu hiyo.

Taarifa ambazo tunazo ni kwamba, kutoka ndani ya Bodi ya Wakurugenzi wa Klabu ya Simba, Dilunga ameanza mazoezi na timu huku kukiwa na makubaliano maalumu ya kusaini mkataba mpya na timu hiyo.

Mtoa taarifa huyo alisema kuwa, kwa kipindi chote hicho jopo madaktari wa timu hiyo wataendelea kumfuatilia kwa ukaribu kiungo huyo ili kujua afya ya majeraha yake.

Aliongeza kuwa lengo ni kujiridhisha kama amepona kwa asilimia mia moja majeraha hayo kabla ya kumpa mkataba mpya wa kuendelea kuichezea Simba katika usajili wa msimu ujao.

“Dilunga mkataba wake ulimalizika tangu msimu uliopita, lakini uongozi uliendelea kumpa matibabu kwa kumpeleka Afrika Kusuni kwa ajili ya matibabu ya goti.

“Hivi sasa amepata nafuu na kuitwa kurejea kambini kuanza mazoezi ya binafsi kabla ya kuanza ya pamoja na wenzake.

“Kwa kipindi chote atafanya mazoezi akiwa chini ya uangalizi wa madaktari watakaofuatilia kwa karibu maendeleo ya afya yake na kama wakijiridhisha amepona kwa asilimia mia moja, basi watapewa taarifa uongozi na kumuongezea mkataba mwingine mpya,” alisema mtoa taarifa huyo.

Meneja wa Habari na Mawasiliano wa Yanga, alizungumzia hilo na kusema kuwa: “Dilunga amerudi nyumbani, hivi sasa yupo chini ya uangalizi wa madaktari.

“Hivyo hatima ya kusajiliwa au kutosajiliwa ipo chini ya uongozi wetu wa juu, hivi sasa akili zetu tumezielekeza katika mchezo wa kimataifa dhidi ya Horoya AC.”