ANTI BETTIE: Mwanaume bahili huyu shangazi, nifanyeje nimchune?

Nina mpenzi ana fedha za kutosha kutokana na miradi anayofanya na kazi nzuri ya kumuingizia kipato cha kutosha. Tatizo hanipi fedha, akinipa sana tena nimejituma Sh100,000 tu.

Naomba mbinu za kumbana anipe fedha za kutosha.

Nifanyeje?

Mirianne, Moshi

Hakuna mbinu za kumbana ili mwenzi wako akupe fedha zaidi ya kauli njema wakati wa kuomba na ufafanuzi wa kina unataka kuzifanyia nini. Hali ni ngumu hakuna anayetoa fedha za kuchezea zaidi ya kufanyia mambo ya msingi, hivyo ukitaka akupe nyingi kuwa mbunifu naamini hawezi kukataa kukupa fedha za maendeleo, lakini ukiomba za mawigi, kusuka, kwenda ngomani, kwa shoga utaendelea kupata hizo hizo hata ukijituma kupindukia. Zingatia kuwa hakuna mwanaume anayetaka mwanamke asiyetumia akili kupata fedha, umiza kichwa utoke na mawazo ya msingi yatakayomshawishi kukupa.

Mapenzi yake yamenishinda

Pia Soma

• 

  Uhusiano kati ya Damu na Tabia
• Sababu za kutopeleka bweni watoto chini ya miaka 10

Anti pole na kazi, kuna kijana nampenda ni mzuri, akivaa anapendeza na ni mpole, lakini aina ya mapenzi yake yanaviondoa vyote hivi katika akili yangu. Nilijaribu kuishi naye baada ya kutoa posa kwetu nikidhani nitambadilisha huu ni mwezi wa sita nimeshindwa. Bwana huyu akipanda punda saa nne hashuki hadi saa saba.

Nifanyeje?

Somoe, Mtama

Pole Somoe ndiyo ukubwa huo. Kama unapata maumivu ambayo yanadumu muda mrefu kutokana na aina ya mapenzi anayokupa zungumza na daktari uende naye akamueleze madhara ya kiafya unayoweza kuyapata kutokana na jambo hilo kukithiri.

Usikubali kuolewa naye kabla hujaliweka sawa hili itakupa shida na utakuwa mtumwa, kila kitu kikizidi inakuwa kero badala ya starehe.

Namtaka wangu nitampata wapi?

Nina umri wa miaka 36. Nimechoka kutoka na waume za watu au wapenzi ambao baadaye ninanyang’anywa kwa sababu sina hakimiliki nao.

Nimechoka nataka wakwangu nitakayemmiliki.

Nifanyeje?

Mnyonge Apendae

DSM

Nahisi unakurupuka kupenda madhara yake unaangukia kwa waume za watu hilo ni kosa, jipange upya. Nakushauri tulia katika wengi wanaokutaka au kukutamani kimapenzi katika vigezo vyako ulivyonavyo, katika kupenda hakikisha kuwa hana mke kiwe kikuu labda tu atakapokuja mwenye mke Muislamu anayeonyesha nia ya kukuoa mke wa pili au wa tatu kwa sababu kwao imehalalishwa.