Baba Levo atangaza vita na wabaya wa Diamond, amtaja Sallam SK

Msanii nguli wa Bongo Fleva na Chawa Promax wa Diamond Platnumz, Clayton Chipando maarufu kama Baba Levo amesema ametangaza vita na mtu yeyote ambaye atajitokeza kumtukana bosi wake, Diamond Platnumz.

Baba Levo amedai kuwa mabosi wa Diamond wajikite kumtengenezea njia lakini kuhusu kupambana na wapinzania wa Diamond, basi yeye amejitoa mhanga kupambana nao kwa kila namna.

"Mimi niseme wazi kwamba mtu yeyote ambaye atatangaza vita na Diamond Platnumz kwa kumuonea nitaingia naye vita. Sitakubali kuona Diamond anaonewa kivyovyote.

"Ninajua wapo watu maalum ambao wamewekwa kwa ajili ya kumsemea Diamond, kum-manage na kila kitu, lakini wana kazi nyingi za kuhakikisha anazidi kuingiza pesa nyingi. Ukiwaingiza kwenye hii vita ya kubishana, unawatoa management nzima waonekane kama ni watu ambao hawako timamu.

"Sasa wao Fella, Babu Tale sijui kama na Sallam SK, wote wajikite kwenye namna ambavyo Diamond atapata pesa, huku kwingine waniachie mimi. Sisi tumeshakubali kuwa kama wehu.

"Sallam sijamuona muda mrefu akiwa pamoja na Diamond lakini sijui mambo yao yanayoendelea huko, kiuhalisia ninaona wanatakiwa kuhakikisha wanapambana Diamond aendelee kuingiza pesa ili tuweze kuishi.

"Diamond ameniajiri hapa Wasafi ninafanya kazi saa mbili tu, hizo saa nyingine 22 nina kazi gani? Ni kuwashambulia wote ambao wanamshambulia Diamond," amesema Baba Levo.