Majaliwa kufungua soko la kwanza la madini Geita

Geita. Waziri Mkuu wa Tanzania, Kassim Majaliwa anatarajia kufungua soko la dhahabu mkoani Geita, Alhamisi Machi 14, 2019  mwaka huu likiwa ni soko la kwanza nchini katika madini ya dhahabu na la tatu kwa ukubwa barani Afrika.

Kuanzishwa kwa soko la dhahabu kunatarajiwa kufungua fursa za kiuchumi kwa mkoa huo.

Mkuu wa mkoa wa Geita, Robert Gabriel akizungumza na waandishi wa habari ofisini kwake leo Jumatatu Machi 11, 2019 amesema mkoa huo unaongoza kwa uzalishaji wa dhahabu kwa zaidi ya asilimia 40 ya dhahabu yote inayozalishwa nchini.

Amesema soko kuu la dhahabu litakalokuwa eneo la soko kuu mjini hapa litakuwa na wadau wote walio kwenye mnyororo wa biashara ya madini wakiwemo wanunuzi, wauzaji, Mamlaka ya Mapato Tanzania (TRA), Tume ya Madini, benki na mamlaka ya serikali za mitaa.

Amesema kuwepo kwa wadau wote eneo moja kutaondoa urasimu na kurahisisha kufanyika biashara.

Kwa mujibu wa mkuu wa mkoa, uwepo wa benki mbalimbali ni kwa ajili ya kurahisisha miamala ya fedha kwa wateja pamoja na kufanya miamala ya fedha taslimu na ile ya kuhamisha kielektroniki ili kuweka usalama zaidi wa fedha za wafanyabiashara.