Fatuma Karume akata mzizi wa fitina Fei Toto kurudi Yanga

Mwanasheria Fatma Karume ambaye anamwakilisha mchezaji Feisal Salum Abdallah 'Fei Toto', amesema amelidhishwa namna mchakato wa usikilizwaji wa Shauri la Marejeo la kesi ya Fei Toto na Yanga mbele ya Kamati ya Sheria na Hadhi za Wachezaji ya TFF.

Fatuma amesema hayo leo Alhamisi, Machi 2, 2023 wakati akizungumza na wanahabari jijini Dar es Salaam mara baada ya kumalizika kusikizwa kwa shauri hilo mbele ya kamati hiyo.

Aidha, Wakili Fatuma amesema kuwa suala la mchezaji huyo kurejea katika Klabu ya Yanga ama kutokurejea ni maamuzi yake binafsi.

“Mimi ninamwakilisha tu, kijana ndiye ana haki ya kusema kama anaweza kurudi au la! Ninamfahamu Feisal kwa hiyo kuja kuniomba mimi kumsaidia haina ubaya. Membo mengine muulizeni yeye siwezi kuyasemea,” amesema Fatuma Karume.

Ikumbukwe kuwa, Desemba 2022, Feisal aliandika barua kuomba kuondoka katika klabu hiyo kwa kile kilichoelezwa kuwa ni maslahi madogo ikilinganishwa na kazi anayoifanya jambo ambalo uongozi wa klabu uligoma.

Hali hiyo ilisababisha mchezaji huyo kuondoka klabuni hapo huku waajiri wake wakipeleka suala hilo TFF ili kuamriwa. Baada ya kusikiliza hoja za pande zote mbili, TFF iliamua Fei nimchezaji halali ya Yanga.

Hata hivyo upande wa Feisal hawakuridhika hivyo walikata rufaa katika Kamati ya Hadhi za Wachezaji wakiomba marejeo ya hukumu yao ambapo madai yao yamesikilizwa leo na kamati hiyo.