VIDEO: Magufuli kuipigia debe DRC kujiunga jumuiya ya Afrika Mashariki

Dar es Salaam. Rais John Magufuli amemueleza Rais wa Jamhuri ya Kidemokrasia na Congo (DRC), Felix Tshisekedi kuwa atampigia debe ili nchi hiyo ijiunge na Jumuiya ya Afrika Mashariki (EAC).

Kiongozi mkuu huyo wan chi ametoa kauli hiyo leo Ijumaa Juni 14, 2019 katika mkutano wa waandishi wa habari akiwa pamoja na Tshisekedi jijini Dar es Salaam.

“Rais Tshisekedi ameniomba nimsaidie kumpigia debe ili nchi yake ikubaliwe kujiunga katika Jumuiya ya Afrika Mashariki, nami nimeridhia,” amesema Magufuli.

Magufuli amesema wananchi wa DRC na Tanzania ni ndugu na wanashirikiana katika masuala mengi.

Hivi karibuni Congo ilimuandikia barua mwenyekiti wa EAC,  Rais wa Rwanda Paul Kagame kuomba kujiunga na jumuiya hiyo ili kuongeza fursa za kiuchumi na maendeleo.

Leo, Tshisekedi amesema lengo la ziara yake Tanzania ni kukuza mahusiano baina ya nchi hizo mbili na kuongeza wigo wa uchumi na biashara.

Habari zinazohusiana na hii

• 

  Congo yaomba kujiunga Jumuiya ya Afrika Mashariki

Tshisekedi amesema kiwango cha biashara kati ya nchi hizo mbili ni kidogo huku kukiwa na idadi ndogo ya wafanyabiasahra waliowekeza kwenye sekta ya madini DRC.

Magufuli amesisitiza  kuhusu kiwango cha biashara baina ya nchi hizo mbili na kutaka ziara ya rais huyo wa DRC kufungua milango ya wafanyabiashara kutoka nchi hiyo kuleta bidhaa na pia kuja kuwekeza nchini katika sekta ya madini, kilimo na viwanda.