Rais Museven kumkabidhi Rais Samia shule aliyoijenga Chato
RAIS Samia Suluhu Hassan na Rais wa Uganda, Yoweri Museveni wanatarajiwa kuwasili wilayani Chato mkoani Geita kwa ziara ya siku moja. Akielezea mapokezi ya ugeni huo, Mkuu wa Mkoa wa Geita, Rosemary Senyamule amesema lengo la ziara hiyo ni makabidhiano ya Shule ya Msingi Museveni iliyopo Kijiji cha Nyabilezi-Chato.
Senyamule alisema shule hiyo imejengwa kwa ufadhili wa serikali ya Uganda chini ya Rais Museveni ambaye ataikabidhi serikali ya Tanzania shule hiyo iliyoanza kujengwa Februari 11, mwaka jana na kukamilika Februari 11, mwaka huu.
“Shule hiyo ni shule ya msingi, ambayo itakuwa inatumia lugha ya Kiingereza na inetegemea kupokea wanafunzi kuanzia wa awali hadi darasa la saba na hadi sasa wameshajenga vyumba 20 vya madarasa… Kwa Wilaya ya Chato itakuwa ndio shule ya kwanza ya serikali yenye mchepuo wa Kiingereza,” alisema.
Alisema shule hiyo inatarajiwa kuanza kutoa masomo Januari mwaka ujao na itaanza kama shule ya kutwa na baadaye inatarajiwa kuwa ya bweni na wazazi watachangia fedha kidogo ya chakula.