TZW
Rais wa Jamhuri ya Muungano wa Tanzania Dkt. John Magufuli ameteuliwa kuwania Tuzo ya Kiongozi Bora Afrika, The African Prestigious Awards zinazotarajia kutolewa nchini Ghana.
Waziri wa Habari Utamaduni Sanaa na Michezo Dkt. Harrison Mwakyembe ndiye aliyweka wazi hilo hapo jana alipokuwa akimkabidhi bendera msanii wa filamu nchini Yvonne Cherrie ‘Monalisa’ anayetarajia kwenda nchini Ghana katika tuzo hizo.
“Tanzania imepata heshima kubwa katika tuzo hizi zenye heshima kubwa katika bara la Afrika ambapo Mhe. Rais wa Jamhuri ya Muungano wa Tanzania Dkt.John Pombe Magufuli ameteuliwa kuwania Tuzo ya Kiongozi Bora Afrika,” alisema Dkt. Mwakyembe.
“Pia tuna wasanii watatu ndani ya tansia ya filamu ambao ni King Majuto anayewania Tuzo ya Mchekeshaji Bora Afrika,Raymond Kigosi anayewania Tuzo ya Msanii Bora wa Kiume Afrika na Monalisa mwenyewe anayewania Tuzo ya Msanii Bora wa Kike Afrika pamoja na Mpiga picha Mahiri Moiz Hussein anayewania Tuzo ya Mpiga Picha Bora Afrika,”aliongeza Dkt. Mwakyembe.
Akiendelea kuzungumza katika sherehe hiyo ya kukabidhi bendera Mheshimiwa Mwakyembe aliwasisitiza wasanii wanchini kuendelea kuandaa kazi zinazoonyesha ubunifu wao kwani ukuaji wa tansia ya filamu Tanzania uko mikononi mwao na si vinginevyo.
Pamoja na hayo nae Monalisa anayetarajia kuondoka nchini mapema wiki hii kwenda nchini Ghana kwa ajili ya Tuzo hizo aliwaahidi Watanzania kuwa lazima atarudi na tuzo kwani anawawakilisha wasanii wenzake hao wawili pamoja na mpiga picha huyo aliyetajwa na pia aliishukuru serikali kwa kumpatia tiketi kwa ajili ya kufanikisha safari hiyo.