Dkt. Akinwumi Adesina akiweka shada la maua kwenye kaburi la Magufuli
Rais wa Benki ya Maendeleo ya Afrika (AfDB), Dkt. Akinwumi Adesina amefanya ziara ya siku moja Wilayani Chato yenye lengo la kutoa salamu za pole kwa familia ya Hayati Dkt. John Pombe Magufuli.
Dkt. Adesina amepokelewa na Kaimu Mkuu wa wilaya ya Chato Wilson Shimo na Kamati ya Ulinzi na Usalama ya wilaya hiyo katika Uwanja wa Ndege wa Geita.
Akiwa nyumbani kwa Hayati Dkt. John Pombe Magufuli Dkt. Akinwumi Adesina amesema amefika nyumbani kwa Hayati Magufuli kutokana na urafiki mkubwa aliokuwa nao yeye na Hayati Rais Magufuli pamoja na kutambua mchango mkubwa ambao Hayati Magufuli aliutoa kwa watanzania na kwa watu wengine.
Rais wa AfDB amesema pamoja na kuondokewa na Rais Magufuli anafarijika kuona Tanzania bado ipo kwenye mikono salama chini ya Rais Samia Suluhu Hassan ambaye anaendeleza yale yote mazuri yaliyoachwa na Hayati Magufuli.
Dkt. Akinwumi Adesina amemshukuru Rais Samia kwa ushirikiano na kumruhusu kufika Wilayani Chato kwa ajili ya kutoa salamu za pole.