Mtoto Museveni: Putin yuko sahihi

Shirika la Habari la Uingereza, BBC limeripoti kuwa mtoto wa Rais wa Uganda, Yoweri Museveni aitwaye Luteni Jenerali Muhoozi Kainerugaba, anaunga mkono uvamizi wa Urusi nchini Ukraine.

Jenerali Kainerugaba ambaye ni Kamanda wa Majeshi ya Nchi Kavu ya Uganda, aliweka ujumbe kwenye akaunti yake ya mtandao wa kijamii wa Twitter, uliosomeka:

“Binadamu wengi (ambao si Wazungu) wanaunga mkono msimamo wa Urusi nchini Ukraine. Putin yuko sahihi kabisa!”

“Wakati USSR (Urusi) ilipoweka makombora yenye silaha za nyuklia nchini Cuba mwaka 1962, nchi za Magharibi zilikuwa tayari kulipua ulimwengu juu yake. Sasa NATO ikifanya hivyo wanatarajia Urusi kufanya tofauti?”

Jenerali Kainerugaba ndiye afisa mkuu wa kwanza wa kijeshi barani Afrika kuunga mkono hadharani uvamizi wa Urusi nchini Ukraine.

Inasemekana kuwa anaweza kuwa mrithi wa baba yake mwenye umri wa miaka 77, ambaye amekuwa madarakani tangu mwaka 1986.

Jumuiya ya Uchumi ya Mataifa ya Magharibi mwa Afrika (ECOWAS) imelaani uvamizi wa Urusi, huku Umoja wa Afrika ukiitaka Moscow kuheshimu eneo la uadilifu. Wizara ya Mambo ya Nje ya Afrika Kusini imetoa wito wa kuondolewa kwa wanajeshi wa Urusi kutoka Ukraine.