Koboko Avamia Sekondari ya Magufuli

Koboko Avamia Sekondari ya Magufuli July 29, 2021 by Global Publishers

WALIMU katika Shule ya Sekondari ya Dk. John Pombe Magufuli, wilayani Kaliua mkoani Tabora wamelazimika kuikimbia nyumba ya kuishi iliyopo ndani ya eneo la Shule hiyo baada ya kuvamiwa na nyoka aina ya koboko anayedaiwa kuwa na sumu, na kuitelekeza nyumba hiyo.

Imeelezwa kuwa ni takribani mwaka mmoja sasa umepita tangu madai ya nyoka aina ya koboko kuvamia nyumba ya walimu katika shule hiyo, na adha hiyo imekuwa kubwa kiasi cha walimu kuamua kukimbia nyumba hiyo na kuacha ikizingirwa na vichaka.

Kaimu Mkuu wa Shule hiyo, Leonard Assenga amesema, “Ni kweli kwenye nyumba wa mwalimu kumeonekana kuna nyoka lakini ile nyumba hajawahi kuishi mtu yeyote hadi sasa na taarifa zilizokuwepo nyoka bado hajatolewa kwakuwa nyoka huyo ni hatari na anatia hofu.”

Kwa upande wake Mwenyekiti wa Serikali ya Kijiji cha Kamsekwa mahali ambako shule hii ipo Ramadhani Juma amedai wamefanya juhudi za kutaka nyoka huyo aondoke lakini bado hazikuzaa matunda.

Mbunge wa Jimbo la Kaliua Aloyce Kwezi amelazimika kufika shuleni hapo, kujionea mwenyewe hali hiyo ambapo ameshauri kutafuta mafuta ya samli na kuyapaka pamoja na kutafuta mtaalum anayehusika na ukamataji wa nyoka ili kusaidia kumuondoa nyoka huyo.

Share this:TweetWhatsApp Related