Alichokisema Biteko kwenye mazishi ya Sendoro

Naibu Waziri Mkuu na Waziri wa Nishati Dkt. Doto Biteko amesema Serikali ipo tayari kushirikiana na viongozi wa dini ili kuwawezesha kutimiza majukumu yao ya kitume kwa maendeleo ya watanzania.

Dkt. Biteko amesema hayo leo Septemba 17, 2024 katika Kanisa la Kiinjili la Kilutheri Tanzania (KKKT) Dayosisi ya Mwanga mkoani Kilimanjaro, wakati akitoa salamu za Serikali mara baada ya ibada ya mazishi ya Askofu wa Dayosisi hiyo Chediel Sendoro.

“Rais yupo tayari kushirikiana na kanisa wakati wowote ili kanisa liweze kufanya kazi zote za kitume na sisi tuko tayari kuifanya Tanzania iwe bora na watanzania waishi vizuri katika nchi yao". amesema Dkt. Biteko

Akihubiri katika ibada hiyo Mkuu wa Kanisa la Kiinjili la Kilutheri Tanzania Askofu Alex Malasusa amesema siku ya leo ni ya pekee ambayo Askofu Sendoro amelala kwenye jeneza na kuwa ni jambo ambalo kibinadamu linatisha lakini hakuna kitakachoweza kuwatenga na tendo la Mungu.

Dkt. Malasusa pia ametumia Jukwaa hilo kuwataka viongozi wa kisiasa kukutana na kuzungumza juu ya changamoto zinazowakabili ili nchi iendelee kuwa na amani na iwe mahali pazuri pa kuishi.

Askofu Chediel Sendoro alifariki dunia kwa ajali ya gari Septemba 09, 2024 katika eneo la Kisangiro wilayani Mwanga Mkoa wa Kilimanjaro.